Á sunnudagskvöldið var brotist inn í útibú Danske Bank í Gautaborg í Svíþjóð. Óhætt er að segja að aðferðin sem var notuð myndi sæma sér vel í góðri kvikmynd.

Innbrotsþjófurinn eða þjófarnir notuðu stiga til að komast upp á þak. Þaðan létu þeir sig síga niður inn í bankann. Þegar þangað var komið gerðu þeir göt á veggi til að komast á milli rýma.

Gautaborgarpósturinn skýrir frá þessu. Þegar frétt blaðsins var skrifuð var ekki ljóst hvort þjófurinn eða þjófarnir hefðu komist á brott með einhver verðmæti. Hver eða hverjir sem voru að verki virðast þó ekki hafa áttað sig á að um útibú er að ræða þar sem ekkert reiðufé er. Það er þó hraðbanki í anddyri hans en hraðbankar eru yfirleitt vel varðir og erfitt fyrir þjófa að ná seðlum óskemmdum úr þeim.