Ástandið í Stokkhólmi af völdum COVID-19 er mjög slæmt miðað við dánartölur. Í gær tilkynntu heilbrigðisyfirvöld í borginni að 18 hefðu látist af völdum veirunnar á einum sólarhring. Í heildina hafa 37 látist af völdum veirunnar í borginni.

„Óveðrið er hér. Við vitum ekki hversu slæmt það verður en við erum í miðju þess. Við aukum viðbúnað okkar og förum á hæsta stig, hamfarastig.“

Sagði Björn Eriksson, yfirmaður heilbrigðismála borgarinnar, á fréttamannafundi í gær.

300 liggja nú á sjúkrahúsum í borginni smitaðir af COVID-19. 65 þeirra eru á gjörgæslu. 2.526 smit hafa verið staðfest í Svíþjóð, flestir hinnar smituðu eru yfir sjötugu.

Eriksson sagði að næstu vikur verði mjög erfiðar fyrir heilbrigðiskerfið í Stokkhólmi og því þurfi að gjörbreyta starfsemi þess. Nú verði einblínt á bráðameðferðir sem þoli enga bið.