Fram að þessu hafa 674 látist af völdum COVID-19 í Frakklandi. Í gær létust 112 af völdum veirunnar. Það var annan daginn í röð sem dánartalan fór yfir 100. Álagið á heilbrigðiskerfi landsins er mikið og í gær sagði Jerome Salomon, forstjóri franska landlæknisembættisins, að yfirvöld hefðu neyðst til að leita aðstoðar hjá nágrannaríkjum sínum.

Hann sagði að baráttan gegn COVID-19 snúist einnig um samstöðu og að skipuleggja sig á evrópskum og alþjóðlegum vettvangi.

„Ég vil senda kærar þakkir til Lúxemborgar, Sviss og Þýskalands sem taka á næstu klukkustundum á móti sjúklingum, sem þurfa að vera í öndunarvélum, í lífshættu frá austurhluta Frakklands.“

Austurhluti landsins hefur orðið verst úti í faraldrinum.

Í gær höfðu 7.240 Frakkar verið lagðir inn á sjúkrahús vegna veirunnar og þar af 1.746 á gjörgæslu.

Þá hafa veikindi heilbrigðisstarfsfólks færst í vöxt og eins og víða annarsstaðar er farið að ganga verulega á birgðir af hlífðarbúnaði eins og andlitsgrímum, hönskum og handspritti.

Reuters segir að frönsk yfirvöld útiloki ekki að þurfa að grípa til forgangsröðunar á sjúklingum á borð við þá sem hefur þurft að grípa til á Ítalíu.