Í júlí næstkomandi ætluðu evrópska geimferðastofnunin ESA og rússneska geimferðastofnunin Roscosmos að senda nýjan Marsbíl, ExoMars rover, af stað til Rauðu plánetunnar. Þetta átti að vera einn af hápunktum geimferða á þessu ári. En nú hefur förinni verið frestað fram til 2022, COVID-19 veiran er ein af ástæðunum fyrir þessu.

ScienceAlert skýrir frá þessu. Marsbíllinn á að grafa í yfirborð Mars og leita að ummerkjum um líf en það mun dragast. Á heimasíðu ESA er haft eftir Dmitry Rogozin, forstjóra Roscosmos, að það hafi verið erfið en vel íhuguð ákvörðun að fresta geimskotinu til 2022.

Aðalástæðan fyrir seinkuninni er að mörg tæknileg vandamál hafa komið upp en Rogozin bendir einnig á að heimsfaraldur COVID-19 hafi einnig tafið verkefnið. Framleiðsla ExoMars bílsins fer fram í mörgum Evrópuríkjum en ferðatakmarkanir vegna COVID-19 valda því að vísindamenn komast ekki á milli landa til að gera það sem gera þarf við framleiðslu bílsins.