Ef allur ísinn á Suðurskautinu myndi bráðna myndi yfirborð sjávar hækka um 57 metra. Sem betur fer er það ekki eitthvað sem er að fara að gerast á næstunni en vísindamenn hafa samt sem áður sífellt meiri áhyggjur af þeirri bráðnun sem nú á sér stað á Suðurskautinu. Niðurstöður rannsókna á undanförnum árum sýna að sífellt meiri ís bráðnar þar.

Niðurstöður nýrrar rannsóknar vísindamann við University of New South Wales (UNSW) í Ástralíu sýna að hluti af ísnum á vesturhluta Suðurskautsins bráðnaði hugsanlega fyrir margt löngu og gæti verið að fara að bráðna aftur.

Um er að ræða bráðnum sem átti sér stað á síðustu milliísöld, sem nefnist Eem, en þá bráðnaði svo mikill ís í vesturhluta álfunnar að yfirborð heimshafanna hækkaði um rúmlega þrjá metra. En þar með er ekki sagan sögð því ísinn bráðnaði í upphafi Eem tímabilsins en þá hafði sjávarhiti hækkað um tæplega tvær gráður.

Chris Turney, aðalhöfundur rannsóknarinnar, segir að þetta sýni hversu viðkvæmt Suðurskautið er fyrir hækkandi hita. Hann líkir þessu við þá þróun sem nú er og segir að hækkandi sjávarhiti og núverandi bráðnun íss á Suðurskautinu geti haft mikil áhrif.

Á Eem tímabilinu hækkaði yfirborð heimshafanna um 6 til 9 metra. Vísindamenn hjá UNSW telja að þrír metrar hafi verið tilkomnir vegna bráðnunar á Suðurskautinu, tveir metrar vegna bráðnunar Grænlandsjökuls og einn metri vegna bráðnunar annarra jökla.