Grænlandsjökull lætur á sjá og bráðnar af völdum loftslagsbreytinganna en á sama tíma er skortur á vatni víða um heim. Þetta ætla Grænlendingar að nýta sér og hyggjast hagnast á bráðnun jökulsins.

Zeit Online skýrir frá þessu. Haft er eftir Jess Svane, úr Siumut flokknum, að loftslagsbreytingarnar eigi sinn þátt í að jökullinn bráðnar og samtímis valdi þær vatnsskorti annarsstaðar í heiminum.

Grænlendingar hafa því veitt 16 fyrirtækjum heimild til að vinna vatn á Grænlandi. Níu þeirra hafa nú þegar einnig fengið heimild til að flytja vatn úr landi. Það er fyrirtækjunum í sjálfsvald sett hvert þau selja vatnið.

Samkvæmt niðurstöðum rannsóknar, sem loftslagsráð SÞ birti í desember, hefur Grænlandsjökull glatað 3.800 milljörðum tonna af ís síðan 1992. Það hefur valdið því að yfirborð sjávar hefur hækkað um 10,6 mm. Rannsóknin sýnir einnig að bráðnunin hefur sjöfaldast á undanförnum þremur áratugum.

Samkvæmt upplýsingum frá SÞ búa rúmlega tveir milljarðar manna við vatnsskort.