Fyrir áhugafólk um Star Wars kvikmyndirnar þá er upplagt að skella sér til Flórída í Bandaríkjunum því í Davenport er búið að koma upp gistiaðstöðu, sem er leigð út í gegnum Airbnb, sem er nokkurskonar sviðsmynd þessa mikla kvikmyndabálks.

Það tekur aðeins um korter að aka frá Disney World að húsinu en þar eru níu svefnherbergi, innréttuð í anda Star Wars, til útleigu. Það er til dæmis hægt að velja herbergi sem er eins og íshellir á plánetunni Hoth, annað sem er eins og mýrarnar á Dagobah og það þriðja sem er eins og Ewok-kofi.

Gangar hússins eru málaðir eins og gangarnir í Þúsundárafálkanum og svo er boðið upp á rúm sem er eins og stjórnklefi geimskipsins. Travel and Leisure skýrir frá þessu.

Samkvæmt upplýsingum á heimasíðunni www.loma-homes.com verður að leigja húsið í tvo daga að lágmarki. Það kostar sem svarar til um 170.000 íslenskra króna. Kannski svolítið mikið en það er rétt að hafa í huga að það er gistirými fyrir allt að 20 manns í húsinu.