Tugir yfirgefinna hótela, langar hvítar sandstrendur og gaddavírsgirðingar sem loka fyrir allt aðgengi að paradísinni. Þannig hefur ástandið verið í kýpverska bænum Varosha í 46 ár eða allt frá því að Tyrkir réðust inn á Kýpur og hertóku helming eyjunnar en hún var undir grískum yfirráðum áður. En nú stefnir í að opnað verði fyrir aðgang fólks að Varosha á nýjan leik.

Á laugardaginn hittust embættismenn frá norðurhluta Kýpur (tyrkneska hlutanum) og tyrkneskra stjórnvalda til að ræða hvort ekki sé hægt að opna Varosha aftur. Varosha var áður fjölsóttasti ferðamannastaðurinn á eyjunni og fræga og ríka fólkið flykktist þangað til að sleikja sólina. En þegar Tyrkir réðust inn á Kýpur flúðu bæjarbúarnir 39.000 og síðan hefur bærinn verið sannkallaður draugabær. Hann hefur verið afgirtur og enginn hefur mátt koma þar nema tyrkneskir hermenn.

Fuat Oktay, forsætisráðherra Tyrklands, telur að sögulegt tækifæri felist í að endurlífga bæinn og það geti styrkt efnahagslífið.