Heilbrigðisyfirvöld í Chicago í Bandaríkjunum skoða nú hvort læknir, sem svipti sig lífi á síðasta ári, hafi falsað skráningar um bólusetningar hjá börnum.

Læknirinn, Van Koinis, skildi eftir sig bréf áður en hann svipti sig lífi. Í bréfinu sagðist hann lengi hafa verið mótfallinn bólusetningum á börnum en jafnframt sagðist hann sjá eftir gjörðum sínum hvað varðar bólusetningar.

Lögregla hefur rannsakað málið að undanförnu og leikur grunur á að Koinis hafi aðstoðað foreldra við að falsa upplýsingar um bólusetningar. Þannig hafi foreldrar leitað til hans, fengið viðurkennt að barn þeirra væri búið að fá ákveðin bóluefni þegar raunin var allt önnur. Þá leikur einnig grunur á að hann hafi ekki bólusett börn þó foreldrar hafi staðið í þeirri trú.

Í frétt Chicago Sun-Times kemur fram að yfirvöld hafi reynt að varpa ljósi á það hvaða börn fengu bóluefni og hvaða börn fengu ekki bóluefni. Það hefur reynst erfitt vegna skorts á skráningum. Hafa yfirvöld hvatt skjólstæðinga hans til að gefa sig fram svo hægt verði að varpa frekara ljósi á þetta. Í sumum tilfellum – en þó ekki öllum – er hægt að staðfesta með blóðprufu hvort viðkomandi hafi fengið bóluefni.