Danska flugfélaginu Danish Air Transport hefur borist krafa um bætur vegna seinkunar á flugi. Það sem gerir þessa kröfu mjög sérstaka er að hún er sett fram fyrir hund að nafni Jack. Það eru tveir farþegar, manneskjur, sem setja kröfuna fram fyrir hundinn.

Jótlandspósturinn skýrir frá þessu. Eigendur hundsins telja að þeir eigi rétt á 250 evrum í bætur vegna seinkunar á flugi sem þeir og hundurinn fóru með á milli Palermo og Lampedusa á Ítalíu. Flugi þeirra seinkaði um fimm klukkustundir en upphaflega fluginu var aflýst og fór fólkið og hundurinn með öðru flugi.

Jesper Rungholm, forstjóri flugfélagsins, segir að farþegarnir eigi rétt á 250 evrum hvor í bætur samkvæmt reglum ESB um réttindi flugfarþega. Hann sagði að flugfélagið hafi ekki í hyggju að greiða bætur fyrir vegna hundsins.

Ef eigendur Jack falla ekki frá kröfum sínum kemur væntanlega til kasta ítalskra dómstóla að skera úr um kröfuna.

Krafa eigendanna er byggð á því að hjá flugfélaginu verður að kaupa sérstakan miða ef hundar eiga að fara með í farþegarýminu. Telja eigendurnir að þar sem reglur ESB gildi fyrir alla með flugmiða, óháð því af hvaða tegund farþeginn er, eigi Jack rétt á bótum.