Nýlega varð Saarah Yob, 23 ára Flórídabúi, fyrir barðinu á þjófi þegar bleikri handtösku hennar var stolið þegar hún var á ferðalagi í New Orleans. Það var eiginlega til að gera daginn enn verri hjá henni en fyrr um daginn hafði bíll hennar gefið upp öndina á leið til New Orleans. Eftir að hafa verið í Franska hverfinu í borginni með vinum sínum uppgötvaði hún að veskinu hennar hafði verið stolið. Sem betur fer var veskið hennar ekki í töskunni og heldur ekki farsíminn hennar. En í því voru GoPro myndavél, smá reiðufé og hálsmen auk annarra hluta.

Það vildi Yob til happs að heiðarlegur borgari fann síðan töskuna hennar. Það var Jems Elmes, 21 árs, sem fann töskuna í Franska hverfinu. Myndavélin var enn í henni en engin skilríki og því voru góð ráð dýr. En Elmes tók mynd af mynd, sem Yob hafði tekið, og birti á Twitter í þeirri litlu von að einhver sæi hana og þekkti þá sem á myndinni voru en það voru Yob og vinkonur hennar með henni á ströndinni.

Hann skrifaði:

„Ég fann stolna tösku í Franska hverfinu í New Orleans. Ekkert veski svo ég er ekki með nein skilríki. Konan hefur ferðast um allan heim . . . með GoPro sem var í töskunni. Leita að henni til að skila minningunum. Hjálpið mér að finna hana.“

Eftir aðeins 16 klukkustundir og 800 endurtíst hafði hann haft upp á Yob og gat skilað töskunni til hennar.