Hann hefur verið nefndur „Bill Gates“ Bretlands en nú á hann framsal til Bandaríkjanna yfir höfði sér vegna ásakana um stórfelld svik. Maðurinn sem um ræðir heitir Mike Lynch en hann stofnaði tölvufyrirtækið Autonomy sem hann seldi til Hewlett Packard (HP) árið 2011 fyrir tæplega 11 milljarða dollara.  Hann gengur nú laus gegn tryggingu á meðan framsalsbeiðnin frá Bandaríkjunum er til meðferðar hjá breskum yfirvöldum.

CNBC skýrir frá þessu. Málið snýst um að HP telur að Lynch hafi þrýst verðinu á Autonomy upp áður en HP keypti það en það hefur reynst HP dýrkeypt. Autonomy sérhæfði sig í hugbúnaði sem leitar í óskipulögðum gögnum eins og tölvupóstum og símtölum. Kaupin áttu að vera stór liður í stefnu HP um að verða hugbúnaðarfyrirtæki frekar en framleiðandi véla en fyrirtækið er einna þekktast fyrir tölvur sínar og prentara.

Ekki leið á löngu eftir kaupin þar til það lá ljóst fyrir að þau voru stór mistök. Aðeins ári eftir kaupin þurfti HP að afskrifa 8,8 milljarða dollara vegna þeirra. Forstjóri fyrirtækisins var rekinn úr starfi og síðan hefur fyrirtækið beint spjótum sínum að Mike Lynch. Hann er sakaður um að hafa rangfært bókhald til að auka verðmæti fyrirtækisins. HP vill fá 5 milljarða dollara endurgreidda frá Lynch en því hafnar hann algjörlega.