Joe Biden, verðandi Bandaríkjaforseti, brákaði ökkla á laugardaginn þegar hann var að leika við hund sinn, Major. Í tilkynningu frá starfsliði Biden kom fram að hann hefði snúið sig á hægri ökkla og ekki væri að sjá að hann hefði brotnað. En myndataka leiddi í ljós að hinn 78 ára verðandi forseti hafði brotið bein í miðju og hægri hlið við rót fótarins sagði Kevin O‘Connor, læknir Biden, í samtali við NBC News.

O‘Connor sagði að Biden þurfi væntanlega að ganga með spelkur um ökklann í margar vikur.

Fréttin fór ekki fram hjá Donald Trump, sitjandi forseta, sem sendi Biden batakveðju á Twitter.

Biden tók Major, sem er þýskur fjárhundur, að sér 2018 en fyrir áttu hann og eiginkonan Jill hundinn Camp sem þau tóku að sér eftir að Biden var kjörinn varaforseti 2008. Þau hafa í hyggju að taka báða hundana með sér í Hvíta húsið þegar þau flytja þangað í janúar og einnig hafa þau í hyggju að fá sér kött.