Að undanförnu hefur dauðsföllum af völdum COVID-19 fjölgað mikið í Indónesíu. Í höfuðborginni Jakartar er ástandið orðið svo alvarlegt að jarðýtur eru nú notaðar til að útbúa nýjan kirkjugarð á fimm ekrum norðan við borgina. Ástæðan er að aðrir kirkjugarðar eru að fyllast.

Á föstudaginn höfðu yfirvöld skráð 105.000 smit í borginni og rúmlega 2.200 dauðsföll.  Samkvæmt gögnum frá Johns Hopkins háskólanum er dánartíðnin í Indónesíu ein sú hæsta í heimi.

Samkvæmt frétt The Washington Post þá gerir það ástandið ekki betra að á næstu mánuðum má reikna með fleiri dauðsföllum af öðrum orsökum en COVID-19 vegna monsúnrigninganna sem hefjast brátt.

Í Jakarta búa rúmlega 10 milljónir en borgin er lítil og þéttbýl. Þar eru því vandamál við að grafa alla því ekki má brenna líkin samkvæmt íslamskri trú en 90% landsmanna eru múslímar.

Yfirvöld gripu til umfangsmikilla sóttvarnaaðgerða í mars vegna heimsfaraldursins og hafa skólar verið lokaðir síðan og öll kennsla fer fram á netinu. Aðeins var slakað á hömlunum um miðjan október og gátu þá fleiri verslanir opnað en aðeins mátti hafa verslanir sem selja matvörur og lyf opnar fram að því.