Það eru ekki allir sömu skoðunar um hvað er skemmtilegt og fyndið. Þessu komst hópur 11 ára barna að um helgina þegar þau tóku upp á því að gera bjölluat hjá fólki. En skemmtunin fékk skjótan endi þegar 83 ára manni fannst þetta ekki fyndið lengur og kom til dyra með öxi á lofti.

Þetta kemur fram í tilkynningu frá lögreglunni á Mið- og Vestur-Sjálandi í Danmörku. Þar kemur fram að maðurinn, sem býr í Holbæk, hafi verið handtekinn í skamma stund vegna málsins sem hófst klukkan 17.19 á sunnudaginn þegar lögreglunni var tilkynnt að maðurinn hefði hlaupið með öxi á lofti á eftir tveimur 11 ára börnum sem höfðu gert bjölluat hjá honum.

Hann hafði fengið sig fullsaddan af þessum leik barnanna og náði sér í öxi og hafði í hótunum við börnin.

Ekki liggur fyrir hverjir eftirmálarnir verða.