Um klukkan 06.15 á laugardaginn fannst nýburi látinn á gatnamótum Victoria Street og Old Commercial Road í Portsmouth. Lögreglan hóf þegar í stað rannsókn á málinu og gengu lögreglumenn meðal annars hús úr húsi á svæðinu og ræddu við íbúa.

Sky skýrir frá þessu. Haft er eftir Simon Baker, lögreglufulltrúa, að lögreglan hafi miklar áhyggjur af móður barnsins og vilji hafa uppi á henni svo hún geti fengið nauðsynlega aðstoð og umönnun. Hann hvatti einnig alla þá sem gætu vitað eitthvað um málið til að hafa samband við lögregluna.

Rétt fyrir hádegi á laugardaginn fannst annað yfirgefið barn í Dalston í Lundúnum en það var á lífi og var strax flutt á sjúkrahús. Lögreglan segir að augljóst hafi verið að barnið hafi ekki fæðst á sjúkrahúsi. Það var klætt í græn föt og var með húfu og vafið inn í hvítt prjónateppi.