Gianna Maria Onore, þrettán ára gömul dóttir körfuboltamannsins Kobe Bryant, var einnig um borð í þyrlunni sem hrapaði í Calabasas í Kaliforníu í dag. Eins og greint hefur verið frá lést Kobe, einn besti körfuboltamaður sögunnar, í slysinu. Hann var 41 árs.
Sjá einnig: Kobe Bryant látinn eftir þyrluslys
Í frétt TMZ kemur fram að Kobe, dóttir hans og fylgdarlið hafi verið á leið á körfuboltaæfingu hjá Mamba Academy þegar slysið varð. Staðfest hefur verið að fimm séu látnir eftir slysið.
Kobe Bryant er fjórði stigahæsti leikmaður í sögu NBA-deildarinnar. Á ferli sínum skoraði hann til að mynda fleiri stig en sjálfur Michael Jordan. Kobe komst 18 sinnum í stjörnuliðið og vann fimm NBA-titla auk þess sem hann var tvisvar valinn besti leikmaður úrslitakeppninnar.
Óhætt er að segja að fjölmargir séu í sárum vegna þessara frétta, enda var Kobe einstaklega vel liðinn bæði innan vallar sem utan. Donald Trump Bandaríkjaforseti birti tíst nú í kvöld þar sem hann sagði þetta skelfilegar fréttir.
Kobe Bryant var kvæntur Vanessu Bryant, en saman eignuðust þau fjórar dætur; Giönnu sem var einnig um borð í þyrlunni, Nataliu, Biancu og Capri sem fæddist í fyrrasumar.
Reports are that basketball great Kobe Bryant and three others have been killed in a helicopter crash in California. That is terrible news!
— Donald J. Trump (@realDonaldTrump) January 26, 2020
