Þrátt fyrir mikla vinnu lögreglunnar og aukna löggæslu í Svíþjóð eru glæpagengi og gróft ofbeldi nær daglegt brauð í landinu. Ofbeldið hefur nú breiðst út til minni bæja og norðurhluta landsins en samt sem áður telja yfirvöld að þróunin sé á réttri leið.

En tölfræði fyrir síðasta ár yfir afbrot er ekki skemmtilesning fyrir Svía. Margir hafa eflaust á tilfinningunni að skotárásir séu nær daglegt brauð hjá þessari frændþjóð okkar og það er ekki svo fjarri raunveruleikanum ef tölfræðin er skoðuð.

320 skotárásir voru skráðar í landinu á síðasta ári og 41 var skotinn til bana. Sá síðasti á gamlársdag í Rinkeby norðvestan við Stokkhólm. Þetta er svipaður fjöldi og var skotin til bana árin á undan. Flestir voru skotnir í Stokkhólmi eða 16 og 10 í suðurhluta landsins.

Í Malmö batnaði ástandið frá 2018 en á síðasta ári voru sjö skotnir til bana í borginni í 37 árásum. 2018 voru árásirnar 47 og fórnarlömbin tólf. Síðasta ár er athyglisvert fyrir þær sakir að ekki hafa verið svo fáar skotárásir á einu ári í Malmö undanfarin sex ár.