Nú er veturinn formlega afstaðinn á suðurhveli jarðar og komið vor, að minnsta kosti samkvæmt dagatalinu. Eitt af því sem fylgir vetrinum er inflúensa en þennan veturinn var hún öðruvísi en hún á að sér, hennar varð eiginlega ekki vart.

Í Suður-Afríku látast allt að 12.000 manns árlega af völdum inflúensu og eru vetrarmánuðirnir júní til ágúst sá tími sem flensan er í hámarki á suðurhvelinu. Sérfræðingar höfðu miklar áhyggjur af inflúensunni fyrir veturinn því óttast var að hún myndi herja af fullum þunga um leið og kórónuveiran og myndi bókstaflega leggja heilbrigðiskerfið á hliðina. Kórónuveiran hefur hegðað sér öðruvísi í Suður-Afríku en Evrópu því flest smitin voru yfir vetrartímann þegar hin hefðbundna inflúensa herjar venjulega.

Að fá inflúensufaraldur ofan í kórónuveirufaraldur hefði gert málin erfið því þá eru komnir tveir hópar sjúklingar með sömu sjúkdómseinkenni, að hluta, sem þarfnast meðferðar en um leið er mikilvægt að þessum hópum sé ekki blandað saman.

En sem betur fer lét inflúensan nánast ekki á sér kræla í Suður-Afríku og greindist aðeins eitt tilfelli að sögn Wolfgang Preiser, yfirmanns smitsjúkdómadeildar Stellenbosch háskólans í Höfðaborg. Deildin sér um rannsóknir á kórónuveirusýnum en einnig inflúensusýnum.

„Þetta er ótrúlegt, við áttum ekki von á þessu. Stóra spurningin er auðvitað af hverju þetta gerðist? Er það af því að við notuðum andlitsgrímur og notum handspritt eða af því að fólk frá norðurhveli jarðar kom ekki í heimsókn?“

Segir Preiser sem segir of snemmt að segja til um hvert svarið er. Þó sé ljóst að þetta tengist kórónuveirufaraldrinum á einhvern hátt.