Hin heimsfræga vísindakona Jane Goodall, sem er nú 86 ára, er ekki í neinum vafa um hver ber ábyrgð á heimsfaraldri kórónuveirunnar sem nú herjar á heimsbyggðina. Goodall er þekkt fyrir baráttu sína í þágu dýraverndar og fyrir rannsóknir sína á öpum og þá sérstaklega simpönsum.

Hún kom fram í norsk/sænska spjallþættinum SKAVLAN í síðustu viku þar sem hún ræddi um veiruna skæðu.

„Ég tel sökina liggja hjá okkur mönnunum. Það eru engin vandamál með leðurblökur ef þær fá að vera í friði þar sem þær eiga heima. Vandinn er að við höfum ruðst inn á búsetusvæði þeirra. Við eyðileggjum skógana þar sem þær búa og þannig komumst við í nánari snertingu við þær.“

Sagði Goodall sem sagði að venjulega smiti leðurblökur önnur dýr þegar þau komast í nána snertingu við þau.

„Síðan kemur þetta dýr til okkar og skapar nýtt vandamál fyrir okkur en það er okkur að kenna.“

Sagði hún og gagnrýndi markaði þar sem lifandi dýr eru seld en kórónuveiran er talin eiga rætur að rekja til slíks markaðar í Wuhan í Kína.

„Meðferðin er hræðileg, það sama á við um aðstæður seljenda og kaupenda sem geta fengið skít, þvag og blóð á sig því dýrin eru oft drepin á þessum mörkuðum. Það eru þessir markaðir með villt dýr í Asíu, bush meat markaðir í Afríku og mikill landbúnaður sem eiga sök á mörgum sjúkdómum hjá okkur.“