Hún er tveggja barna móðir, bandarískur ríkisborgari og aðalpersónan í kenningum og samtölum margra samsæriskenningasmiða þessa dagana um upptök COVID-19 heimsfaraldursins. Þeir telja að hún hafi viljandi borið veiruna með sér til Kína til að koma faraldri af stað og að veiran sé lífefnavopn.

CNN skýrir frá þessu.

„Þetta er eins og að vakna upp af slæmum draumi og ganga inn í martröð dag eftir dag.“

Sagði konan, sem heitir Maatje Benassi, í samtali við CNN.

Allt hófst þetta í mars þegar fyrstu ásakanirnar á hendur henni birtust á YouTube en þar geta allir birt myndbönd og komið skoðunum sínum á framfæri.

Maatje starfar hjá Bandaríkjaher og tók þátt í verkefni í kínversku borginni Wuhan þar sem COVID-19 kom fyrst fram á sjónarsviðið.

Myndböndin, með samsæriskenningum um aðild Maatje að útbreiðslu veirunnar, hafa fengið mörg hundruð þúsund áhorf og hefur verið mikið deilt á kínverskum samfélagsmiðlum. Kínverskir ríkisfjölmiðlar hafa einnig fjallað um þau.

Bandarísk yfirvöld vísa því algjörlega á bug að Maatje hafi tekið lífefnavopn í formi kórónuveiru með til Wuhan til að dreifa veirunni. Mark Esper, varnarmálaráðherra, sagði í yfirlýsingu að þessar ásakanir væru „hlægilegar og óábyrgar“.

En það hefur ekki haldið aftur af einhverjum sem telja Maatje eiga hlut að máli. Meðal annars hefur heimilisfangi hennar og eiginmanns hennar verið lekið á netið. Þau fengu einnig ríflegan skammt af skilaboðum á samfélagsmiðlum og neyddust á endanum til að loka aðgöngum sínum á þeim. CNN segir að hvorki hún né eiginmaðurinn hafi smitast af COVID-19.