Margir hafa eflaust varpað öndinni léttar þegar fréttir bárust nýlega frá Kína um að engin ný COVID-19 smit hafi greinst í Hubei-héraðinu þar sem veiran fór fyrst á kreik. En getur verið að kínversk yfirvöld skýri ekki alveg satt og rétt frá í þessum efnum?

Því heldur hinn óháði kínverski miðill Caixin að minnsta kosti fram. Yfirlýsingum kínverskra yfirvalda var vel tekið enda sýndu þær að hægt er að hafa stjórn á veirunni og fyrir marga víða um heim var þetta smávegis ljóstýra á dimmum og erfiðum tímum.

Samkvæmt umfjöllun Caixin þá hafa kínversk yfirvöld fegrað tölurnar í Hubei. Ónafngreindur heimildamaður innan heilbrigðiskerfisins sagði miðlinum að „margir, eða rúmlega tugur“ greinist daglega með COVID-19.

„Á þessum tímapunkti er ekki hægt að draga þá ályktun að faraldurinn sé afstaðinn.“

Sagði heimildamaðurinn.

Þrátt fyrir að yfirvöld segi að engin ný tilfelli hafi greinst hefur Li Keqiang, formaður ríkisráðsins, hvatt kínverska fjölmiðla til að vera heiðarlegir í umfjöllun um fjölda nýsmita. Samkvæmt frétt The Guardian sagði hann að það geri ekkert gagn ef fjölmiðlar eigi við tölurnar til að halda þeim nærri núlli.