Nýlega hélt Fusco fjölskyldan, sem býr í New Jersey í Bandaríkjunum, matarboð. Það hafði hræðilegar afleiðingar því fjórir fjölskyldumeðlimir létust í kjölfarið af COVID-19 veirunni sem þeir smituðust af í boðinu. Fjórir til viðbótar smituðust og eru enn á sjúkrahúsi.

Á miðvikudaginn lést Grace Fusco, 73 ára, af völdum veirunnar. Þegar hún lést vissi hún ekki að áður hafði veiran orðið elsta syni hennar og dóttur að bana. Elsta dóttir hennar, Rita, lést nokkrum dögum áður 55 ára að aldri. Elsti sonur hennar, Carmine, lést nokkrum klukkustundum á undan móður sinni. Frændi þeirra, Vincent Fusco, lést á fimmtudaginn af völdum veirunnar.

The New York Times hefur eftir Paradiso Fodera, frænda þeirra og lögmanni fjölskyldunnar, að fjórir til viðbótar úr fjölskyldunni séu smitaðir af veirunni og liggi á sjúkrahúsi, þar af eru þrír í lífshættu.

Tæplega 20 fjölskyldumeðlimir eru nú í sóttkví vegna málsins.

„Ef þeir eru ekki í öndunarvél, eru þeir í sóttkví. Þetta er svo hræðilegt. Þeir geta ekki einu sinni syrgt eins og þeir vildu.“

Sagði Fodera.

Embættismenn telja að smit fjölskyldunnar megi rekja til John Brennan, 69 ára, sem var fyrsti íbúinn í New Jersey til að látast af völdum veirunnar.