Danska ríkisstjórnin kynnti í gærkvöldi enn harðari aðgerðir til að reyna að hefta útbreiðslu COVID-19 veirunnar en áður hafði verið gripið til margvíslegra aðgerða. Frá og með klukkan 10 í dag mega fleiri en 10 manns ekki koma saman og gildir bannið innan- og utandyra á opinberum vettvangi. Ríkisstjórnin mælist einnig til að fólk fylgi þessari reglu á heimilum sínum. Bannið nær þó ekki til vinnustaða og almenningssamganga.

Auk þess verður verslunarmiðstöðvum lokað sem og kaffihúsum, hárgreiðslustofum, skemmtistöðum, börum og nær öllum öðrum verslunum nema þeim sem selja matvörur. Matsölustöðum verður heimilt að selja mat sem viðskiptavinir sækja eða fá sendan heim. Líkamsræktarstöðvar verða einnig að loka.

Auknar kröfur verða gerðar til matvöruverslana og verða þær nú að gera viðskiptavinum kleift að þvo sér um hendurnar og/eða nota handspritt í verslununum. Verslanirnar verða einnig að tryggja að viðskiptavinirnir haldi góðri fjarlægð sín á milli.

Apótek verða áfram opin. Nóg er til af mat og lyfjum í landinu og er almenningur því hvattur til að stilla innkaupum í hóf, engin þörf sé á að hamstra.