Naktar konur, unglingsstúlkur og rassamyndir á veggjum. Þetta er meðal þess sem sést í myndbandi sem lögreglan í Palm Beach á Flórída birti nýlega. Í myndbandinu sýnir lögreglan úr hverju hún hefur þurft að vinna í tengslum við ásakanir á hendur Epstein um að hafa beitt unglingsstúlkur kynferðislegu ofbeldi og beinlínis að hafa selt þær í vændi.

Hægt er að horfa á myndbandið á vef news.com.au. Í því sést að heimili Epstein virðist, að minnsta kosti að hluta, hafa verið innréttað eins og vændishús. Bleikt veggfóður, rauðleit birta, mikið af nektarmyndum og kynlífsleikföngum.

Epstein viðurkenndi árið 2005 að hafa beitt 14 ára stúlku kynferðislegu ofbeldi. Hann samdi við saksóknara og slapp með 13 mánaða fangelsisdóm sem hann fékk að afplána við sérstaklega góðar aðstæður.

Í júlí á síðasta ári voru nýjar ásakanir settar fram á hendur Epstein og var hann handtekinn og úrskurðaður í gæsluvarðhald grunaður um að hafa komið barnaníðingshring á laggirnar þar sem hann seldi barnungar stúlkur í vændi og beitti þær sjálfur kynferðislegu ofbeldi.

Epstein fyrirfór sér í fangelsinu í ágúst á síðasta ári.