Það mun væntanlega aldrei líða Wolf Cukier, 17 ára, úr minni að hann fékk að fara í starfsþjálfun hjá bandarísku geimferðastofnuninni NASA. Eftir aðeins þrjá daga uppgötvaði hann áður óþekkta plánetu sem er tæplega sjö sinnum stærri en jörðin.

CNN skýrir frá þessu.

Cukier, sem er frá New York, var að skoða gögn frá TESS-stjörnusjónaukanum þegar hann sá merki frá sólkerfi sem nefnist TOI 1338. Í fyrstu taldi hann að um sólmyrkva væri að ræða en sá síðan að hér var um plánetu að ræða.

Hún hefur fengið heitið TOI 1338 b og er um 1.300 ljósár frá jörðinni. Í sólkerfi hennar eru tvær stjörnur (sólir) og er plánetan á braut um þær báðar og er eina plánetan í sólkerfinu sem það gerir. Minnir svolítið á heimaplánetu Loga geimgengils, Tatooine, í Stjörnustríði.