Gríðarlegur halli er á rekstri bandaríska alríkisins og fer hann sífellt vaxandi og ekkert bendir til að breyting verði þar á. Samkvæmt nýjum tölum frá fjármálaráðuneyti landsins, Treasury Department, var hallinn á fyrstu 11 mánuðum fjárlagaársins 1.000 milljarðar dollara. Það er tæplega 20 prósent meiri halli en á sama tíma fyrir ári.

Þetta þýðir auðvitað að skuldabyrði alríkisins er orðin gríðarleg og kostar 1 milljarð dollara í vexti á degi hverjum!

Vaxandi hallarekstur er aðallega tilkominn vegna skattalækkana sem Donald Trump og stjórn hans hafa fengið í gegn og vegna fjárútláta sem þingið hefur samþykkt. Á sama tíma hafa útgjöld til heilbrigðismála aukist vegna breyttrar aldurssamsetningar þjóðarinnar en sífellt stærra hlutfall landsmanna flokkast sem eldri borgarar.

Í stuttu máli sagt þá hefur innkoman í ríkiskassann dregist saman og útgjöldin aukist.

Nýjustu spár frá útgjaldaskrifstofu þingsins, CBO, benda til að skuldir ríkisins muni að meðaltali aukast um 1.200 milljarða dollara á ári hverju næsta áratuginn.

Í þessu sambandi er rétt að hafa í huga að Trump hefur lofað að losa landið við þessar svimandi háu skuldir.

Á aðeins einum áratug hafa heildarskuldir landsins tvöfaldast og eru nú rúmlega 22.000 milljarðar dollar en það er meira en verg þjóðarframleiðsla.