Vísindamenn hafa fundið fyrstu vísbendinguna um að ákveðin gen ráði því hvort fólk er örvhent eður ei. Svo virðist sem ákveðin gen hafi fengið „leiðbeiningar“ um að fólk skuli nota vinstri höndina frekar en þá hægri. Þessar leiðbeiningar virðast einnig tengjast uppbyggingu og virkni heilans, sérstaklega þeim hlutum hans sem tengjast tungumálinu.

Það voru vísindamenn við Oxfordháskóla sem komust að þessu. Þeir segja ekki útilokað að örvhent fólk sé betra í að tala, hafi meiri hæfileika, en þeir sem teljast rétthentir. En þrátt fyrir að þetta sé komið fram þá er enn margt á huldu um tengslin á milli þroska heilans og hinnar ráðandi handar.

Um tíu prósent fólks er örvhent. Rannsóknir á tvíburum hafa sýnt að erfðir ráða að einhverju leyti hvort fólk er örvhent eður ei. En ekki hefur áður tekist að kafa eins djúpt ofan í þetta og nú.

Rannsóknin byggir á erfðamengi um 400.000 manns og var erfðamengi þeirra allra kortlagt til fulls. Rúmlega 38.000 þeirra voru örvhentir. Niðurstöður rannsóknarinnar hafa verið birtar í vísindaritinu Brain.