Hvíthákarlar hafa verið sjaldséðir gestir í evrópskum sjó fram til þessa en þó hefur það gerst að slík dýr hafa slæðst hingað í álfuna. En að undanförnu hafa margir hvíthákarlar (Great White Shark) sést við strendur Devon á Englandi.

Devon Live skýrir frá þessu. Haft er eftir mörgum sjómönnum að þeir hafi séð hvíthákarla. Hvíthákarlar eru hættulegir, eins og flestir hákarlar, en þeir geta orðið ógnarstórir. Kannski má segja að fólk hafi hræðst þá mikið frá því að fyrsta Ókindar (Jaws) kvikmyndin var sýnd fyrir margt löngu.

Ashley Lane, sem stendur fyrir veiðiferðum við Devon, segir að hann telji það ekki bara slæm tíðindi að hættuleg dýr á borð við hvíthákarla séu í sjónum við Devon. Fólk elski að sjá svona dýr og þetta geti komið sér vel fyrir þann rekstur sem hann er með.

„En það má auðvitað ekki raska jafnvæginu í vistkerfinu. Þetta eru ekki gæludýr og það á ekki að líta á þau sem slík.“

Ken Collins, hjá Southampton háskóla, segir að ekki sé útilokað að hvíthákörlum muni fjölga. Öruggt megi teljast að hákörlum muni fjölga við strendur Bretlands á næstu þremur áratugum.  Þar verði ekki endilega bara um hvíthákarla að ræða heldur ýmsar aðrar tegundir.