Að minnsta kosti fimm eru látnir og óttast er um afdrif rúmlega tuttugu ferðamanna eftir að eldgos braust út á White Island undan ströndum Nýja-Sjálands í morgun.

Um er að ræða þekkta eldfjallaeyju sem er vinsæl meðal ferðamanna og var nokkuð stór hópur á eyjunni þegar eldgos braust út nær fyrirvaralaust.

Myndbönd sýna örvæntingarfulla ferðamenn á báti við eyjuna en þeir höfðu skoðað gíginn aðeins hálftíma áður en gosið byrjaði. Annar hópur var við gíginn þegar eldgosið byrjaði og er einhverra saknað. Talið er að 50 manns hafi verið á eyjunni eða við hana þegar eldgosið byrjaði.

Í frétt Mail Online, sem birti myndbandið sem sést hér að neðan, kemur fram að átján einstaklingum hafi verið komið í öruggt skjól en staðfest hefur verið að fimm eru látnir. Óttast er um afdrif tuttugu og sjö einstaklinga. Björgunarstarf hefur reynst erfitt enda aðstæður á eyjunni hættulegar.