Nýlega klippti Kim Jong Un, einræðisherra í Norður-Kóreu, á rauðan borða þegar nýr bær var tekinn í notkun í þessu harðlokaða einræðisríki. Bærinn heitir Samjiyon en þar geta um 4.000 fjölskyldur búið. Meðal þess sem hefur verið byggt þar er skíðasvæði og knattspyrnuvöllur.

BBC skýrir frá þessu. Hin opinbera fréttastofa Norður-Kóreu, KCNA, segir bæinn vera „táknmynd siðmenningarinnar“. BBC segir að þrælar hafi verið látnir reisa bæinn, það er að segja fólk sem er haldið í þrælkunarbúðum í landinu. Þetta hefur ríkisfjölmiðill landsins, sem er eini fjölmiðillinn þar í landi, ekki sagt neitt um því þar er aðeins fjallað um gleðina og ánægjuna með nýja bæinn.

BBC hefur eftir Colin Zwirko, fréttamanni hjá NK News, sem hefur aðsetur í Bandaríkjunum en fjallar um málefni Norður-Kóreu, að bærinn eigi að vera einhverskonar „fullkomið“ módel sem er hægt að sýna ferðamönnum. Nú líti hann vel út, þrifalegur bær með fallegum byggingum. Þessi bær sé ólíkur öllum öðrum bæjum í Norður-Kóreu.

Um 10.000 ferðamenn, aðallega Kínverjar, koma til Norður-Kóreu á ári hverju.