Bandaríska skyndibitakeðjan Chick-fil-A sætir nú mikilli gagnrýni frá mörgum íhaldsmönnum eftir að keðjan rauf tengsl sín við íhaldssöm kristin samtök sem eru á móti hjónaböndum samkynhneigðra. Meðal þeirra sem hafa gagnrýnt keðjuna vegna þessarar ákvörðunar eru þeir Ted Cruz og Mike Huckabee sem eru áberandi og áhrifamiklir innan repúblikanaflokksins.

Það hefur einnig verið þyrnir í augum íhaldsmanna að fyrir tveimur árum gaf keðjan háa fjárhæð til mannréttindasamtaka sem styðja frjálsar fóstureyðingar og hinsegin fólk.

Chick-fil-A hefur lengi verið vinsæl meðal hægrisinnaðra Bandaríkjamanna vegna fjárhagslegs stuðnings keðjunnar við Hjálpræðisherinn og The Fellowship and Christian Athletes.

„Ef þetta er rétt hefur Chick-fil-A villst af leið. Milljónir kristinna hafa verið stoltir af hugrökkum stuðningi Chick-fil-A við trúfrelsi. Að fjármagna þá sem hata viðskiptavini þína er sorglegt.“

Skrifaði Ted Cruz á Twitter.

Mike Huckabee segir að keðjan hafi „svikið trausta viðskiptavini sína fyrir peninga“.

Hingað til hefur það verið hinn vængurinn sem hefur gagnrýnt keðjuna fyrir stefnu hennar í málefnum hinsegin fólks. Fyrr á árinu neyddist keðjan til að loka fyrsta veitingastað sínum á Englandi eftir að mikil gagnrýni frá samtökum hinsegin fólks varð til þess að verslunarmiðstöðin, þar sem veitingastaðurinn var, neitaði að framlengja leigusamninginn.

Þá hafa tengsl keðjunnar við andstöðu gegn hinsegin fólki verið greinileg. Dan Cathy, forstjóri keðjunnar, hefur ekki farið leynt með andstöðu sína við hjónabönd samkynhneigðra. Þetta hefur haft áhrif á vöxt keðjunnar og orðið til að hún hefur misst af mörgum góðum stöðum fyrir veitingastaði.