Kínverjar krefjast þess að Bandaríkin felli niður alla nýja tolla á kínverskar vörur en þetta á að vera hluti af fyrsta hluta viðskiptasamnings á milli ríkjanna. Kínverjar sætta sig ekki bara við að hætt verði við að leggja nýja tolla á vörur þeirra, fella þurfi niður tolla sem nú þegar hafa verið lagðir á þær.

Global Times skýrir frá þessu. Þetta eykur aftur á óvissuna um hvort hægt verði að binda enda á viðskiptastríð þessara tveggja stórvelda.

Global Times er stýrt af kommúnistaflokknum svo telja verður heimildir blaðsins mjög góðar. Blaðið segir að loforð Bandaríkjamanna um að hætta við að leggja á nýja tolla þann 15. desember geti ekki komið í stað niðurfellingar tolla sem þegar hafa verið lagðir á. Þarna vísar blaðið til þess að Bandaríkin hafa boðað að nýir tollar verði lagðir á kínverskar vörur síðar í mánuðinum.

Viðskiptastríðið hefur staðið yfir nær allan tíma Donald Trump á forsetastóli. Hann hefur lagt refsitolla á kínverskar vörur að verðmæti 400 milljarða dollara. Kínverjar hafa svarað þessu með því að leggja tolla á bandarískar vörur. Í byrjun síðasta mánuðar sagði Trump að hann myndi ekki fella nýju tollana niður. Í síðustu viku sagði hann síðan að ríkin væru nærri því að ná saman um fyrsta hluta samnings sem á að binda enda á tollastríðið.