Zain Qaiser, tölvuþrjótur frá Essex á Englandi, var í apríl dæmdur í sex ára fangelsi fyrir netglæpi. Hann játaði að vera meðlimur í rússneskum tölvuþrjótahópi. Hann hafði haft milljónir punda upp úr krafsinu. Peningana hafði hann meðal annars notað til að gista á lúxushótelum, til að kaupa sér þjónustu vændiskvenna, til að stunda fjárhættuspil og til að kaupa lúxusvarning.

Qaiser stundaði að kúga fé út úr fólki sem heimsótti klámsíður. Fórnarlömb hans voru í 20 löndum. Hann keypti auglýsingapláss á klámsíðum og kom spilli- og njósnaforritum fyrir í auglýsingunum. Þannig öðlaðist hann aðgang að tölvum fórnarlamba sinna.

Qaiser hefur nú verið gert að endurgreiða fórnarlömbum sínum rúmlega 270.000 pund og verða eigur hans seldar til að standa undir endurgreiðslunum en þær eru einmitt metnar á rúmlega 270.000 pund. Sky skýrir frá þessu. Ef honum tekst ekki að endurgreiða fórnarlömbunum innan tveggja mánaða bætast tvö ár við fangelsisdóm hans.