Sumum finnst grænmeti ekki gott og hafa margar kenningar verið settar fram í gegnum tíðina á ástæðum þess, kannski sérstaklega af foreldrum sem hafa reynt að fá börn sín til að innbyrða þessa hollustu. En nú telja vísindamenn við læknadeild Kentucky háskólans sig hafa fundið ástæðuna fyrir þessu.

Samkvæmt frétt BBC þá telur Jennifer Smith, prófessor í hjarta- og æðasjúkdómum við deildina, að hér liggi erfðafræðilegar ástæður að baki. Hún segir að við fáum þetta að erfðum frá foreldrum okkar og það séu því erfðir sem ráða því hvort okkur finnst blómkál og gulrætur góðar.

Smith og samstarfsfólk hennar fylgdist með 175 manns og komust þau að því að þeir sem voru lítt hrifnir af grænmeti og borðuðu lítið af því voru með gen, sem er frábrugðið sama geni hjá þeim sem eru sólgnir í grænmeti. Fólk, sem er með þetta frábrugðna gen, er líklegra til að finnast grænmeti of biturt á bragðið og það getur einnig brugðist neikvætt við dökku súkkulaði, kaffi og jafnvel bjór.