Bandaríska alríkislögreglan FBI hefur heitið allt að 5 milljónum dollara, sem svara til um 600 milljóna íslenskra króna, fyrir upplýsingar sem leiða til handtöku rússneska tölvuþrjótsins Maksim Viktorovich Yakubets. Hann er, ásamt fleiri Rússum, grunaður um að hafa staðið á bak við risastóran þjófnað í netheimum og að hafa kúgað tölvunotendur í Bandaríkjunum og Evrópu. Þetta kostaði milljarða.

Ákæra hefur verið gefin út á hendur Maksim og Igor Olegovich Turashev, samverkamanni, hans í Bandaríkjunum.

Þeir stýra skipulögðum glæpasamtökum sem kalla sig Evil Corp. Þetta eru samtök sem sérhæfa sig í netglæpum. Þeim hefur að sögn FBI tekist að fá rúmlega 10.000 tölvunotendur til að opna tengla og skjöl sem litu trúverðuglega út. Síðan gátu þeir tekið tölvur notendanna yfir og komist yfir bankaupplýsingar þeirra. Þannig gátu þeir millifært háar fjárhæðir yfir á eigin reikninga, meðal annars frá skóla og olíufyrirtæki.

Samtökin hafa einnig smitað mörg þúsund tölvur af spilliforritum sem læstu tölvunum. Síðan kröfðust samtökin „lausnargjalds“ sem varð að greiða með rafmyntum.

Liðsmenn samtakanna eru sagðir lifa lúxuslífi í Rússlandi og hafi meðal annars notað þýfið til að kaupa sér dýra bíla.