Þrátt fyrir að ofbeldisverkum fari fjölgandi í Mexíkó og sífellt fleiri merki þess að stjórnvöld hafi misst völdin til eiturlyfjahringja sjáist á sumum svæðum landsins bera margir Mexíkóar mikið traust til Andreas Manuel Lopez Obrador forseta. En stóra spurningin er hversu lengi það mun vara?

Efnahagslíf landsins er nánast í kyrrstöðu, morðtölurnar slá hvert metið á fætur öðru en samt sem áður hefur stuðningur við forsetann ekki dregist mikið saman á því ári sem hann hefur verið við völd. Kosningabarátta Obrador byggðist á loforðum um að taka til í spilltu stjórnkerfi landsins og að láta ríkisvaldið vinna fyrir almenning í stað elítunnar. Mörgum landsmönnum finnst það einmitt vera það sem hann að gera.

Hann hefur sett peninga í félagsleg verkefni fyrir bændur, eldra fólk og fyrir námsmenn. Hann hefur lagt mikla áherslu á að heimsækja litla bæi um allt land í staðinn fyrir utanlandsferðir. Þá hafa laun opinberra starfsmanna, þar á meðal hans sjálfs, verið skorin niður. Hann seldi einnig lúxusflugvélina sem forverar hans notuðu og flýgur sjálfur á almennu farrými með áætlunarflugi. Með þessu hefur honum tekist að byggja upp orðspor sem maður alþýðunnar og því vilja margir gefa honum meiri tíma þrátt fyrir að árangurinn sé lítill til þessa.