Fyrir ári síðan var yngsta milljarðamæringi Afríku, Mohammed Dewji rænt í Dar es Salaam, höfuðborg Tansaníu. Í viðtali við BBC skýrði hann í fyrsta sinn frá þessari hræðilegu lífsreynslu. Í viðtalinu segir hann að eftir að hann hafði verið í haldi í fimm eða sex daga með bundið fyrir augun öllum stundum hafi hann verið farinn að halda að hann væri að verða blindur og missa vitið.

„Þú getur bara skotið mig og drepið.“

Segist hann hafa sagt við mannræningjana þegar þeir hótuðu að drepa hann.

„Þetta var nokkurskonar pynting.“

Segir hann um það sem hann upplifði.

Í október 2018, tíu dögum eftir að honum var rænt, tilkynnti fyrirtæki hans, MeTL, á Twitter að Dewji væri kominn heim heill á húfi. Ekkert lausnargjald var greitt og enn í dag hefur Dewji ekki hugmynd um hver tilgangurinn með ráninu var.

„Ég veit ekki enn af hverju þetta gerðist. Þetta líktist því að þeir vildu fá peninga. Að lokum skildu þeir mig eftir án þess að hafa fengið peninga.“

Leigubílstjórinn Mousa Twaleb hefur verið handtekinn og ákærður vegna málsins en enginn annar hefur enn sem komið er verið handtekinn.

Forbes telur að auður Dewji sé um 1,5 milljarðar Bandaríkjadala.