Á föstudaginn réðust skógarhöggsmenn á hóp veiðimanna úr Guajajara-ættflokknum þegar þeir voru á veiðum í Arariboia verndarsvæðinu í Maranhao ríki í norðurhluta Brasilíu. Einn þeirra, Paulo Paulino Guajajara, var skotinn í höfuðið og lést hann af völdum áverka sinna. Annar var einnig skotinn en slapp lifandi frá árásinni.

Leiðtogi ættflokksins skýrði frá þessu á laugardaginn. Það voru skógarhöggsmenn, sem stunda skógarhögg í óleyfi, sem réðust á veiðimennina. Sífellt algengarar er að skógarhöggsmenn og námuvinnslumenn ráðist inn á verndarsvæði frumbyggja Brasilíu. Þetta hefur færst mjög í vöxt eftir að hægrimaðurinn Jair Bolsonaro tók við forsetaembættinu á síðasta ári. Hann hafði heitið því að opna verndarsvæðin fyrir skógarhöggi og námuvinnslu.

„Ríkisstjórn Bolsonaro hefur blóð frumbyggjanna á höndum sínum.“

Segir í yfirlýsingu sem Apib-samtökin sendu frá sér á laugardaginn. Þetta eru samtök frumbyggja en þeir eru um 900.000 í Brasilíu. Samtökin segja að aukning á ofbeldisverkum gegn frumbyggjum sé bein afleiðing af hatursræðu forsetans og hugmyndum hans um frumbyggja landsins.

Sonia Guajajara, leiðtogi Apib, segir að ríkisstjórn landsins sé að leggja niður fjölda ríkisstofnana sem eiga að vernda frumbyggja landsins og umhverfið. Með þessu eigi margir ættflokkar engan annan kost en að verja sig og verndarsvæði sín sjálfir fyrir ágangi utanaðkomandi.

„Það er kominn tími til að stöðva þetta stofnanavædda þjóðarmorð.“

Skrifaði hún á Twitter.

Paulo Paulino Guajajara var á þrítugsaldri og lætur son eftir sig. Hann barðist fyrir vernd Amazon og hafði verið í fararbroddi í þeirri baráttu og hafði margoft komið fram í fjölmiðlum til að ræða þessi mál.