41 árs karlmaður var nýlega sakfelldur af undirrétti í Kaupmannahöfn fyrir fjórar nauðganir og eina nauðgunartilraun. Hann var dæmdur til ótímabundinnar vistunar í fangelsi. Þetta er þyngsta refsing sem hægt er að dæma í Danmörku. Þeir sem hljóta þessa refsingu geta ekki sloppið úr fangelsi fyrr en dómstóll metur þá hæfa til þess og því geta þeir þurft að dúsa alla ævi í fangelsi.

Maðurinn var ákærður fyrir fjórar nauðganir, eina nauðgunartilraun, rán, þjófnaði og hótanir. Allt átti þetta sér stað í samfélagi fíkniefnaneytenda í Kaupmannahöfn. Maðurinn var fundinn sekur um öll ákæruatriði.

Þrjár af nauðgununum og nauðgunartilraunin áttu sér stað nærri Halmtorvet en svæðið er þekkt fyrir að þar halda fíkniefnaneytendur og vændiskonur til en þar eru jafnfram vinsæl kaffihús og íbúðir.