Ástarsamband Mörthu Lovísu Noregsprinsessu og Sjaman Durek Verret hefur vakið mikla athygli í Noregi og víða um heim. Allt frá því að þau opinberuðu samband sitt í maí hafa þau verið mikið í sviðsljósinu. Nú eru þau enn og aftur forsíðuefni eftir að hafa rætt við blaðamann bandaríska vikublaðsins People.

Í viðtalinu segir Verrett að hann og Martha Lovísa hafi ríkt yfir Egyptalandi til forna.

„Þegar við erum saman og ég horfi á hana kemur fyrir að ég sjái annað andlit. Það sama á við um hana. Ég á minningar um okkur í Egyptalandi. Hún var drottningin mín og ég var faró.“

Sagði Verrett.

Í viðtalinu segjast þau bæði hafa haft á tilfinningunni að þau hafi hist í fyrri lífum.

„Hún sagði, ég man eftir þér, ég veit hver þú ert. Þá svaraði ég, já, við þekkjumst frá því fyrir löngu. Þetta kom bara ósjálfrátt út úr mér.“

Sagði Verrett. Martha Lovísa hafði sömu sögu að segja um fyrsta fund þeirra.

„Ég kom inn og þekkti hann strax. Ég bara, ég þekki þig, það var það fyrsta sem ég sagði við hann.“

Sagði hún.