Nýlega lést 65 ára karlmaður á heimili sínu í Kolding á Jótlandi í Danmörku. 10 dagar liðu þar til lík hans var flutt úr íbúðinni. Hér virðist röð mistaka og misskilnings hafa valdið því að enginn taldi sig eiga að koma líkinu í líkhúsið og vísar hver aðilinn á annan þegar spurt er út í málið.

JydskeVestkysten skýrir frá þessu. Það var starfsmaður heimahlynningar, einkafyrirtækisins Kære Pleje, sem fann manninn látinn. Lögreglan var kölluð á vettvang eins og venja er þegar fólk andast utan sjúkrahúss. Lögreglan staðfesti strax að ekkert saknæmt hefði átt sér stað og lauk þar með afskiptum hennar af málinu.

En líkið var ekki fjarlægt úr íbúðinni og vilja hvorki Kære Pleje né lögreglan taka á sig ábyrgð vegna þess. Talsmaður lögreglunnar segir að samskiptavandamál virðist hafa átt sér stað en talsmaður Kære Pleje segir að fyrirtækið hafi fylgt öllum starfsreglum í málinu.