Dómstóll í Bretlandi hefur úrskurðað að Deanne Kingson, 58 ára ritari í sendiráði Katar í London, fái 390 þúsund pund, rúmar 62 milljónir króna, í bætur vegna ítrekaðrar áreitni.
Deanne var meðal annars krafin um kynlíf af starfsmönnum og beðin um að skipuleggja svallveislur. Fyrir dómi sagði Deanne að starfsmenn hafi talið hana líklega til að láta undan kröfum starfsmanna, þar á meðal yfirmanna, í ljósi þess að hún var ekki múslimi. Hún fékk að heyra ýmis niðurlægjandi og kynferðisleg orð frá samstarfsmönnum.
Einn þeirra sem gekk hvað harðast fram var Fahed Al-Mushairi sem reyndi ítrekað að fá Deanne til að sofa hjá sér. Hann bauð henni til dæmis ítrekað upp á khat – plöntu sem inniheldur örvandi efni og er sagt meðal annars auka kynhvöt og vellíðan. Þegar Fahed náði ekki markmiði sínu beindi hann spjótum sínum að nítján ára dóttur Kingson. Sagðist hann ætla að bjóða henni í verslunarferðir til Parísar og sagðist einnig ætla að kvænast henni til að geta stundað með henni kynlíf..
Kingson starfaði í sendiráðinu á árunum 2006 til 2014 að henni var sagt upp störfum fyrirvaralaust. Hún sagði að henni hafi oft verið hótað uppsögn ef hún gerði ekki það sem hún var beðin um, hvort sem það tengdist starfi hennar beint eða áhugamálum starfsmanna utan vinnu.
Kingson sagði að henni hafi liðið ömurlega í vinnunni, glímt við þunglyndi og jafnvel íhugað sjálfsvíg. Hún hafi þó átt erfitt með að segja upp störfum og verða atvinnulaus í ljósi þess að hún er einstæð móðir með tvö börn. Í frétt Mail Online kemur fram að sendiráð Katar hafi ekki tekið til varna í málinu.