Í lok október lýstu yfirvöld á Samóa því yfir að mislingafaraldur herjaði á eyríkið. Nú hefur neyðarástandi verið lýst yfir vegna faraldursins. Það er gert í kjölfar nokkurra dauðsfalla af völdum sjúkdómsins.

Öllum skólum hefur verið lokað og yfirvöld reyna að koma í veg fyrir að fólk safnist saman. Tilkynnt var um fyrsta dauðsfallið í október og síðan hafa minnst sex manns látist. Flest hinna látnu eru börn undir tveggja ára aldri segir heilbrigðismálaráðuneyti landsins. Ekkert þeirra var bólusett gegn mislingum.

Um 200.000 manns búa á Samóa en eyjarnar eru í Kyrrahafi, um það bil mitt á milli Nýja-Sjálands og Hawaii.