Andrew Bretaprins tjáði sig í löngu viðtali við BBC um kynni sín af níðingnum Jeffrey Epstein og ásakanir á hendur honum um að hann hafi haft mök við ungar stúlkur sem Epstein gerði út í vændi. Jeffrey Epstein fannst látinn í fangaklefa sínum fyrir skömmu en hann átti yfir höfði sér margar ákærur fyrir mansal og kynferðisbrot.

Í viðtalinu segir Andrew að kynni sín af Epstein hafi verið miklu minni en umfjöllun fjölmiðla gefi til kynna. Þá segist hann hafa hitt Epstein til að binda endi á samband þeirra í kjölfar þess að Epstein var ákærður fyrir kynferðisbrot. Var tekin ljósmynd af þeim saman við það tækifæri og sú mynd hefur birst í fjölmiðlum. Andrew viðurkennir hins vegar í viðtalinu að hann hafi þegið kvöldverðarboð hjá Epstein eftir þennan fund.

Andrew neitar því þráfaldlega í viðtalinu að hafa haft mök við Virginiu Giuffre en hún hefur haldið því fram í fjölmiðlum. Segist Andrew hafa farið með dóttur sinni á pitsastað kvöldið sem Virginia segist hafa haft mök við hann. Er hún ein þeirra stúlkna sem talið er að  Epstein hafi hneppt í kynlífsþrældóm.

Breskir fjölmiðlar eru flestir á því að viðtalið hafi komið mjög illa út fyrir Andrew. Segja sumir að það sé álíka slæmt og kjarnorkusprenging.

Lesendur geta dæmt sjálfir um hversu vel prinsinn kemur út þarna en viðtalið er í spilaranum hér fyrir neðan.