„Það er eitt sem þið þurfið öll að skilja. Það er að drottning kemur aldrei of seint.“ Þetta sagði söngkonan Madonna á tónleikum í Las Vegas um síðustu helgi. Tónleikagestir fögnuðu þessum orðum hennar með lófataki.

En þrátt fyrir þessi orð sín hefur Madonna ákveðið að flytja tónleika sína í Miami þann 17. desember næstkomandi frá klukkan 20.30 til 22.30. CNN skýrir frá þessu. Þetta fellur ekki í góðan jarðveg hjá Nate Hollander, aðdáanda hennar, sem var búinn að kaupa sér miða á tónleikana. Hann vill ekki fara á tónleika sem byrja svona seint, miklu seinna en gengið var út frá þegar hann keypti miðana.

Hann hefur því stefnt Madonnu og Live Nation, sem skipuleggur tónleikana, og segir að það sé samningsbrot milli Madonnu og þeirra sem hafa keypt miða á tónleikana að breyta upphafstíma þeirra. Hann krefst bóta frá þeim.

Hann keypti þrjá miða og greiddi fyrir þá sem svarar til um 120.000 íslenskra króna. En þrátt fyrir að honum finnist tónleikarnir eiga að byrja alltof seint hefur hann ekki getað fengið miðana endurgreidda.

Tónleikarnir eru hluti af tónleikaferðinni Madame X Tour sem byggir á nýjustu plötu Madonnu sem ber einmitt nafnið Madame X.