Það vakti mikinn óhug í Danmörku, Noregi, Svíþjóð og Finnland í síðustu viku þegar skemmdarverk voru unnin á heimilum gyðinga, bænahúsum og grafstæðum þeirra aðfaranótt 10. nóvember. Magnus Ranstorp, fremsti sérfræðingur Norðurlandanna í málefnum hryðjuverkamanna, sagði í samtali við danska dagblaðið Information að hér hafi hugsanlega verið um samhæfðar aðgerðir að ræða. Með þessu hafi öfgahægrimenn ætlað að sýna að þeir standi sterkir að vígi í löndunum fjórum og að þeir geti látið að sér kveða og það jafnvel á öflugri hátt en með þessum aðgerðum. Hann sagðist telja að Norræna mótstöðuhreyfingin hafi staðið að baki árásunum og varar við samtökunum.
Þau hafa látið aðeins á sér bera hér á landi með mótmælum og dreifingu áróðursbæklina að undanförnu.
TV2 í Danmörku hefur eftir Jacob Vullum Andersen, talsmanni Norrænu mótstöðuhreyfingarinnar, að samtökin hafi ekki staðið á bak við árásirnar en fór ekki leynt með að hann styðji þá sem stóðu að þeim.
„Okkur finnst jákvætt að fólk sé loksins farið að vakna og átta sig á að valdamiklir gyðingar og áhrif gyðinga í samfélaginu eru mjög skaðleg og eitthvað sem við viljum ekki.“
Danskir fjölmiðlar segja að tveir meðlimir í Norrænu mótstöðuhreyfingunni hafi verið handteknir grunaðir um að hafa unnið skemmdarverk á legsteinum gyðinga í Randers. Annar þeirra er sagður vera leiðtogi hreyfingarinnar í Danmörku. Hann var úrskurðaður í gæsluvarðhald í gær. Samkvæmt fréttum danskra fjölmiðla þá fannst málning heima hjá honum eins og var notuð til að skemma legsteinana.
