Það er óhætt að segja að bandaríski draumurinn lifi góðu lífi í Kína. Þar fjölgar milljónamæringunum stöðugt og milljarðamæringum einnig. Á nýjum lista yfir 400 ríkustu Kínverjana eru 60 ný nöfn. Það er einnig athyglisvert að 59 þeirra hafa byggt auð sinn upp frá grunni, eru frumkvöðlar.

Það var Forbes sem tók listann saman. Hann sýnir að það er enn hægt að efnast vel í Kína þótt fólk verði að byrja á núlli. Á sama tíma er orðið miklu erfiðara fyrir Bandaríkjamenn að brjótast úr fátækt til auðlegðar.

Listi Forbes er einnig áhugaverður fyrir þær sakir að til að vera tekinn inn á hann þarf fólk að eiga einn milljarð dollara en áður var miðað við 840 milljónir dollara. Sjö af nýju milljarðamæringunum hafa efnast vel á að selja löndum sínum menntun. Þeirra á meðal er Li Yongxin, 43 ára, en hann á rúmlega 9 milljarða dollara og er í 22. sæti listans. Hann auðgaðist vel þegar fyrirtæki hans, Offcn Educations Technology, var skráð á hlutabréfamarkað. Fyrirtækið sér um kennslu fyrir um 2,3 milljónir Kínverja.