Dorothy Flowers, 108 ára, býr í Southlands Care Home í Harrogate á Bretlandi. Hún fagnaði nýlega 108 ára afmælinu með pompi og prakt. Hún þakkar kampavínsdrykkju langlífið að sögn Helen Ballinger, framkvæmdastjóra dvalarheimilisins.

Ballinger sagði að einu skiptin sem starfsfólkið hafi séð Flowers klára úr glasi sé þegar hún drekkur kampavín. Hún sagðist eiginlega ekki þurfa að taka fram að Flowers hafi fengið kampavín á stóra deginum.

Auk þess fékk hún rúmlega 650 afmæliskort víða að úr heiminum.

Eiginmaður hennar, Leonard, lést 1981. Þau voru barnlaus en Flowers er í góðu sambandi við frænku sína Judith sem sagði að Flowers væri ánægðust þegar hún er innan um fólk. Hún sé brosmild þrátt fyrir að geta ekki talað lengur.