Pör sem láta pússa sig saman vita sem er að það er ekki ókeypis. Heath Bumpous, ungur maður í Texas í Bandaríkjunum, komst að þessu á dögunum. Hann greip til örþrifaráða þegar hann sá að allt stefndi í að hann gæti ekki keypt giftingarhring fyrir verðandi eiginkonu sína.

Það var á föstudag að Heath gekk inn í bankaútibú í Groveton í Texas. Hann sagði gjaldkera að hann væri vopnaður áður en hann krafðist þess að fá peninga afhenta.

„Í raun sagði hann það berum orðum að hann væri að fara gifta sig daginn eftir. Þá sagði hann að hann ætti ekki nægan pening fyrir hringnum sem hann vildi kaupa og salnum þar sem veislan átti að fara fram,“ segir Woody Wallace, lögreglustjóri í Groveton, við ABC News.

Ekki leið á löngu þar til mynd úr öryggismyndavél bankans rataði á Facebook-síðu lögreglunnar og á síður fréttamiðla. Þar mátti sjá býsna skýra mynd af Heath. Myndbirtingin fór ekki fram hjá verðandi eiginkonu hans sem var vægast sagt mjög undrandi, að sögn lögreglu.

„Hún hafði samband við hann og spurði hvort hann hefði verið að ræna banka og sannfærði hann um að hún vissi að þetta væri hann á myndinni. Myndin var komin út á allt á Facebook og hún sagði honum að hann þyrfti að gefa sig fram,“ segir Wallace og bætir við að Heath hafi verið handtekinn skömmu síðar.

Lögreglu tókst að endurheimta nær alla peningana sem Heath hafði upp úr krafsinu í ráninu. Hann verður ákærður fyrir bankarán og segir lögregla að málið verði sótt af fullum þunga. Heath gæti átt þungan dóm yfir höfði sér. Engum sögum fer af því hvort brúðkaupið sé enn á dagskrá.